राप्रपाको भण्डाफोरमा भ्रष्टाचार विरोधी लिङ्देन र भ्रष्टाचार आरोपी पाण्डे एउटै मञ्चमा

काठमाडौँ । राप्रपाका अध्यक्ष राजेन्द्र लिङ्देनले सांसद पदबाट राजीनामा दिँदै २०७९ भदौ १९ गते भनेका थिए, ‘यहीँबाट घोषणा गर्न चाहन्छु कि म आजबाट सांसदको रुपमा यहाँ उपस्थिति हुनेमात्रै छैन, मेरो नाममा पठाइने तलब, भत्ता, सुविधा समेत रोक्का गरियोस् । म कहीँ लेखेर दिनुपर्छ भने लेखेर दिन तयार छु ।
कुनै पनि अनैतिक काममा लाग्न मेरो आत्माले मानेन । मेरो अन्तरआत्माको निर्देशनअनुसार सबै त्याग गर्न उपस्थिति भएको छु ।’ मौजुदा प्रतिनिधिसभा सदस्यका लागि निर्वाचनको मिति घोषणापछि पनि संसद बैठक बस्ने र सांसदहरुले सेवा सुविधा लिने कार्यप्रति अहसमति जनाउँदै उनले संसद बैठकमार्फत् नै राजीनामा घोषणा गरेका थिए । राजीनामा घोषणा गर्दै लिङ्देनले अर्को संसद (अहिलेको) मा आफू एक्लै नआउने र बलियो पार्टीका रुपमा उपस्थित हुने घोषणासमेत गरेका थिए । संसदमा गरेको घोषणालाई साकार बनाउँदै उनले २०७९ मंसिर ४ गते सम्पन्न निर्वाचनबाट राप्रपालाई प्रतिनिधिसभामा पाँचौँ ठूलो दलका रुपमा उभ्याए । पार्टीलाई पाँचौँ शक्तिको रुपमा संसदमा सहभागी गराउन अध्यक्ष लिङ्देनको ‘भ्रष्टाचार गर्नु आमाको रगत खानु सरह हो’ भन्दै भ्रष्टाचारविरुद्धको संकल्प गर्नु नै प्रमुख कारण थियो ।
अघिल्लो संसदको कार्यकाल होस् या मौजुदा संसदमा पनि उनले भ्रष्टाचार, अनियमितता र बेथितिविरुद्ध आवाज बुलन्द बनाउँदै आएका छन् । उनकै नेतृत्वमा अहिले देशभर भ्रष्टाचार र बेथितिविरुद्ध भण्डाफोर कार्यक्रम राप्रपाले गरिरहेको छ । सातवटै प्रदेशमा राप्रपाले भ्रष्टाचार र बेथितिविरुद्ध र संवैधानिक राजतन्त्र र सनातन हिन्दू राष्ट्र पक्षमा भण्डाफोर कार्यक्रम गरिरहेको छ । तर, भ्रष्टाचार र बेथितिविरुद्ध आजाव बुलन्द मात्र होइन व्यवहारमै देखाएका अध्यक्ष लिङ्देनले भ्रष्टाचारको आरोप लागेका आफ्नै सांसद विक्रम पाण्डेलाई भने भण्डाफोर कार्यक्रममा सहभागी किन गराउँदैछन् ? विवादित व्यक्तिलाई कार्यक्रममा सहभागी गराएर राप्रपाले गरेको भ्रष्टाचार र बेथितिविरुद्धको भण्डाफोर कार्यक्रमको औचित्य पुष्टि हुन्छ र ? ‍‍‍‍कालिका कन्स्ट्रक्सन प्रालिका प्रमुख तथा सांसद विक्रम पाण्डेविरुद्ध सिक्टा सिँचाइ आयोजनामा भएको भ्रष्टाचारसम्बन्धी मुद्दा सर्वाेच्च अदालतमा विचाराधिन छ । भ्रष्टाचारको आरोपित व्यक्तिलाई साथमा लिएर अध्यक्ष लिङ्देनले भ्रष्टाचार र बेथितिविरुद्ध भण्डाफोर कार्यक्रम गर्नु आन्तरिक शक्ति सन्तुलन मिलाउन कि आफ्नै संकल्प र अभियानबाट पछि हटेको संकेत हो ?
यदी भ्रष्टाचार गर्नु आमाको रगत खानु सरह हो भन्ने अध्यक्ष लिङ्देन किन भ्रष्टाचार आरोपी सांसद पाण्डेलाई भ्रष्टाचारकै अभियानमा साथमा लिएर हिँडेका छन् ? उनलाई के बाध्यता आइलागेको हो ? राप्रपाले शनिबार भ्रष्टाचार र बेथितिविरुद्धको कार्यक्रम गर्दै छ ।
साथै काठमाडौँ, धनगढी, सुर्खेत र जनकपुरमा पनि भ्रष्टाचार र बेथितिविरुद्धको कार्यक्रम गर्न लागेको राप्रपाले भ्रष्टाचारको आरोप लागेका आफ्नै सांसद विक्रम पाण्डेलाई सहभागी गराएपछि कार्यक्रमप्रति नै प्रश्न उठेको हो । पाण्डेलाई कार्यक्रममा सहभागी गराउने कार्यप्रति बौद्धिक जमातले राम्रो मानेका छैनन् भने राप्रपाकै कार्यकर्ता पनि सन्तुष्ट छैनन् ।