पिपलकाे पातमा काेर्छन् मान्छेकाे चित्र, आर्टमा यस्तो लगाव (भिडिओ)

पिपलको पातमा मान्छेको आकृति । सुन्दै अचम्म लाग्ने यो प्रतिभाका धनि हुन् निरज खनाल । चितवनको पदमपुर निवासी निरज खनालले पिपलको पातमा दुरुस्तै मान्छेको आकृति बनाइदिन्छन् । अहिलेसम्म उनले बलिउड र कलिउडका चर्चित कलाकारदेखि चर्चामा रहेका विभिन्न व्यक्तिको आकृति पिपलको पातमा कोरेका छन् ।

निरजलाई पिपलको पातमा मान्छेको आकृति बनाउन पेन्सिल र ब्लेड भए पुग्छ । पहिले पेन्सिलले कोर्छन् । त्यसपछि त्यसलाई ब्लेडले काटेर दुरुस्तै मान्छेको आकृति बनाइदिन्छन् । उनले बनाएका चित्र पृष्ठभूमि सेतो राखेर वा आकासतर्फ फर्काएर हेर्दा प्रष्ट देखिन्छन् । हेर्नुहोस् उनले पिपलको पातमा बनाएको केही चर्चित व्यक्तिहरुको चित्र ।

उनी सामाजिक संजाल टिकटकमा भाईरल छन् । यो भिडियो तयार पार्दासम्म टिकटकमा उनलाई ८० हजार भन्दा धेरैले पछ्याईरहेका छन् । सामान्यतः पिपलको पातमा मान्छेको चित्र बनाउन उनलाई झण्डै दुई घण्टा लाग्छ । पेपरमा स्केच कोर्दै आएका निरजले रहरै रहरमा पिपलको पातमा पनि चित्र बनाउन शुरु गरेका थिए । अहिले यो व्यवसायिक समेत बन्न थालेको छ ।

निरजले एउटा चित्र बनाए वापत दुई हजार रुपैयाँसम्म लिने गरेका छन् । जसमा पिपलको पातमा बनाइएको चित्र उपहार हुनेछ । जस्ताको त्यस्तै चित्र बनाउने निरज पढ्न पनि सिपालु छन् । उनी अहिले विज्ञान विषयमा वनस्पती शास्त्र अध्ययन गरीरहेका छन् । सादा पानामा पेन्सील दौडाएर होस वा पीपलको पात काटेर दुरुस्तै चित्र बनाउने निरजलाई कुनै दिन पढ भन्न परेन ।

रहर मेट्नको लागि मात्रै चित्र बनाएको बताउने निरज भविष्यमा भने वनस्पती शास्त्री बन्ने सोचमा छन् । उनै प्रतिभाका धनीसँग हामीले कुराकानी गरेका छौ ।